O‘zbekiston Respublikasi Xalq ta’limi vazirligi

Dehqonobod tumani xalq ta`limi bo`limi

Yangiliklar

Олтин ва кумуш медаллар иқтидорли битирувчиларга олий ўқув юртига киришида имтиёз тақдим этмайди

Халқ таълими вазирлиги 22 февраль куни Ўзбекистон Республикаси Вазирлар Маҳкамасининг 154-сонли қарори асосида “Умумий ўрта таълим муассасалари ва академик лицейларнинг иқтидорли битирувчиларини олтин ва кумуш медаллар билан тақдирлаш тартиби тўғрисида низом” тасдиқланганлиги ҳақида хабар берган эди.

Мазкур хабарни, таълимга ихтисослашган баъзи Telegram каналларида нотўғри талқин этилаётгани, яъни олтин медал олган мактаб битирувчисига кириш имтиҳонларида тўплаган умумий балига 50 фоиз, кумуш медал олган мактаб битирувчисига эса 30 фоиз балл қўшиб берилишига оид нотўғри маълумотлар чоп этилаётганини маълум қиламиз.

Юқорида келтириб ўтилган Низомда олтин ва кумуш медаллар билан тақдирланган ўқувчиларга имтиёзлар берилиши кўзда тутилмаган. Шу ўринда таъкидлашимиз жоизки, олтин ва кумуш медаллар аъло баҳоларда ўқиган ўқувчиларга берилишини инобатга олсак, кириш имтиҳонларида имтиёзли баллар берилмасада, ўз билимларини кўрсата олишлари лозим. Қолаверса, Халқ таълими вазирлиги олий ўқув юртига кириш учун талабгор ёшларга тенг имкониятлар тақдим этиш тарафдори.

Бундан кўзланган мақсад ўқувчиларни таълим олишга бўлган қизиқишларини янада ошириш, улар ўртасида соғлом рақобатни шакллантириш, коррупцион ҳолатларни олдини олиш ва иқтидорли ўқувчилар билимини рағбатлантиришдан иборатдир.

Халқ таълими вазирлиги таълимга ихтисослашган баъзи Telegram-каналларни тизимга оид асосланмаган ва ёлғон маълумотларни тарқатмасликка чақиради.

Шунингдек, халқ таълими тизимига оид асосланган ахборотларни вазирликнинг www.uzedu.uzсайти, телеграмдаги расмий канали (@uzedu) ва фейсбукдаги саҳифаси (@uzedu) орқали олишингиз мумкин.

Манба: uzedu.uz веб саҳифаси